DBH 3koek bisita interesgarria jaso dute, Mikel Santos “Belatz” marrazkilariarekin solasean aritzeko aukera izan dute eta. Belatzek “Gerezi garaiak”, eleberri grafikoaren egileak, marrazkilari baten sekretu ia guztiak erakutsi dizkie Lizeoko ikasleei.

“Gerezi garaiak” komikian Lucio Urtubia langile eta anarkista nafarraren bizitza kontatzen da, Belatz, bere aldetik, Luciorekin izan zuen harreman estuaz aritu da ikasleekin. Komiki bat egiteko prozesuaz ere aritu da hizketan.

Ikasleek marrazki originalak esku artean hartu eta ikusteko pribilegioa izan dute eta egileari galderak egiteko aukera ez dute alferrik galdu.

Belatzen bisita hau, ikasgelan landutakoa borobiltzeko modu bat izan da, “Gerezi garaiak” eleberri grafikoa irakurri eta lantzen aritu baitira gelan. Amerikako Estatu Batuetako First National City Bank ia porrotera eraman zuen Lucio Urtubia igeltsero nafarraren bizitzaz gehiago jakiteaz gain, garai historiko hura gehiago ezagutzeko aukera aprobetxatu dute.