Giro paregabean ospatu genuen atzo, apirilak 22, 2018ko Lizeo Eguna. Emozioen dantza izena zuen aurtengo ekitaldiak eta, musika eta koloreak lagun, emanaldi ikusgarria bezain zirraragarria eskaini ziguten HH, LH eta DBHko ikasleek: poza, tristura, beldurra edota nazka bezalako emozioak maisuki irudikatu zituzten.

Hunkigarria izan zen, halaber, agurren txanda. Batxilergoko 2. mailako ikasleak, 1982ko ikasleen promozioa eta erretiroa hartuko duten langileak izan ziren omenduak. Giroak goia jo zuen orduan, eta emozioen festa bihurtu zen jaialdia.

Haurren eta helduen bazkarien ondotik, eta eguraldia lagun, elkarturiko guztiok primeran pasatu genuen arratsaldeko dantzaldian, egunari ginga polita jarriz.

Gure eskerrik beroena, beraz, atzoko egun handia antolatzen eta aurrera ateratzen lagundu zenuten guztioi. Biba zuek!