Igandean, urriaren 7an Kilometroak jaia izango da Urretxu Zumarragan bertako ikastolak antolatuta eta zu2ak1uz lelopean. Hauxe leloaren zergaitia:Zubiak batu nahi ditu Urretxu-Zumarraga Ikastolak 2018ko urriaren 7an ospatuko den Kilometroak jaian. Bi herri gara, bakoitza bere izaerarekin, baina, askotan, baten moduan funtzionatzen dugunak. Zubiak batu, indarrak biderkatu eta elkarrekin antolatuko dugu festa handi hau. Bi herriek elkarrekin eta Ikastola bera ere zubi. Ikastola osatzen dugun ikasle, irakasle eta gurasoek ere zubiak batu behar ditugu. Elkarrekin, batuz, gaindituko ditugu oztopoak eta lortuko helburuak.
Kilometroetarako gonbitea egiten diogu komunitate guztiari, Kilometroak eta ikastolen mugimenduak antolaturiko beste lau jaiak, oraindik ere, ezinbesteko zaizkigulako ikastola hezkuntza proiektuak ekonomikoki iraun ahal izateko. Auzolanean oinarrituz sortu ziren Kilometroak gisako jaiak; eta auzolanari eutsiz, guztion lanari eta ekarpenei esker, sortuko ditugu ikastola berriak eta egunez egun indartuko dugu ikastolen mugimendua. Gonbita hirukoitza da: Alde batetik jai eguna gozatzeko gonbita egiten dizuegu. Kontuan hartuz Urretxu eta Zumarragara joateko garraio publikoa erraza dela, aurten Lizeoak ez du autobusik jarriko. Trenean joatera animatu nahi zaituztegu! 
Bestetik, aurten ere badugu beste pizgarri bat: Lizeoko ikasle talde batek parte hartuko du, seigarrenez, Erronka izeneko proban. Beraien inguruan animatzen aritzea oso garrantzitsua da beraientzat.
Baina bada parte hartzeko beste modu bat ere egun horri itxaron gabe, Gipuzkoako ikastolen festa laguntzea Klikmetroak ekimenaren bitartez. Klikmetroak.kilometroak.eus webgunean sartu eta bisitari bakoitzak metro bana egitea da helburua; eta hala, bisitariek
egindako metro bakoitzeko, babesleek dirua jarriko dute Kilometroen alde. Egin zure metro birtuala!
Beraz, motibo eta aukera nahikoa dugu Kilometroetan parte hartzeko. Animatu!!