Joan den ostegunean, hilaren 21ean, lankidetza-hitzarmena sinatu zuten gure ikastolak eta Pasaiako Udalak. Udaletxean izan zen sinatze ekitaldia, eta Edurne Urkiolak eta Izaskun Gomezek parte hartu zuten, Lizeoko zuzendaria eta Pasaiako alkatea hurrenez hurren.

Joan den abenduaren 18ko udalbatzarrean onartu zen, aho batez, hitzarmena, baina ofizialki sinatzea falta zen. Pasaiako Udalean ordezkatuta dauden alderdi guztiek
–PSEk, EH Bilduk, EAJk eta Podemosek– Lizeoaren jardueraren helburuak izaera publikoa duela aitortzen dute akordioan, eta, halaber, denek ere nabarmentzen dute gure ikastolak Pasaiako haur eta gazteen euskalduntzean egiten duen ekarpena nahiz Udalarekin modu iraunkorrean gauzaturiko elkarlana.

Hitzarmenak, beraz, Lizeoak sorreratik izan duen izaera herritarrari erantzuten dio, eta bi aldeek 2001. urtean sinatutakoari ematen dio segida. Orain sinatu denak lau urteko iraupena du, eta bereziki jasotzen du Pasaiako egoera geografikoak eraginda ikasleak autobusez mugitzeak eragindako gastuan familiei laguntzeko asmoa duela. Alta, aurretik zegoen hitzarmenaren aldean, oraingoaren ekarpen ekonomikoa % 20 inguru jaitsi da.

Horiek hala, Lizeoan oso pozik gaude udal ordezkariengandik aho batez jasotako aitortzarekin, baina lanean jarraituko dugu ekarpena lehengoratzeko eta diru kopurua handitzeari begira.