Azken urteen antzera, AESLEME elkarteko partaideen bisita jaso dugu Lizeoko eraikin nagusian. Bizkarrezur-muineko lesioaren ikerketarako elkartea da, eta gisa honetako lesioa duten pertsonek eta beren senitartekoek nahiz laguntzaileek osatzen dute .

Hala, eta Gerta dakizuke izena duen istripuak saihesteko kanpainaren baitan, hitzaldi bana eman zieten Batxilergoko eta Desberdintze Curricularreko gure ikasleei azaroko azken bi asteetan.

Hitzaldietan azpimarratu zutenez, bizkarrezurreko zein muineko lesioak 15 eta 25 urte bitarteko gazteen artean ematen dira nagusiki, eta istripuek eraginda batik bat. “Lesio mota hauek ondorio fisiko arinak edo oso larriak utz ditzakete, baina ez dago atzera egiterik: behin betiko lesioak dira”, nabarmendu zuten AESLEME elkarteko partaideek. “Horregatik, era horretako lesioak eragin ditzaketen istripuak eta egoerak saihestea da konponbidea; prebentzioa, bestela esanda”.

Saio arinak izan ziren, baina oso interesgarriak, fikziozko bideoak eta gertaera errealak nahastuz. Ikasleek adi-adi jarraitu zituzten hizlarien azalpenak, eta egunerokoan oso kontuan izateko kontseiluak eta gomendioak jaso zituzten.