OMENALDIA GURE IKASTOLARI

Pasaia-Lezo Lizeoari aipamen berezia eta omenaldia egin zioten ikastolen ikasturte hasierako ekitaldian. Gure ikastolarekin batera, 50 urte bete dituzten beste zazpi ikastola ere jaso zuten aitortza bera: Aita Larramendi ikastola (Andoain); Asti Leku ikastola (Portugalete); Elgoibarko ikastola (Elgoibar); Orereta ikastola (Errenteria); Resurreccion Maria Azkue ikastola (Lekeitio); San Benito ikastola (Lazkao) eta Santo Tomas Lizeoa (Donostia).

Iragan irailaren 28an egin zen ekitaldia, Andoaingo Bastero kulturunean. Euskal curriculuma eta Hezkuntza Legea batera garatzeko beharra dagoela aldarrikatu zuten ikastolek, Koldo Tellitu Ikastolen Elkarteko lehendakariaren ahotik.

Espainiako eta Frantziako gobernuek ikastolei eta hezkuntza sistemari egindako “erasoak” ere salatu zituen Tellituk, urriaren 12an Espainiako Gobernuaren hezkuntza erreformaren kontra Bilbon egingo den manifestazioan parte hartzera deituz.