Joan den maiatzaren 6an, Joseba Larretxe Josevisky marrazkilariarekin solasaldian aritzeko parada izan zuten LHko 6. mailako ikasleek, Donibaneko Ubera liburutegian, horretarako, Pasaiako Udalak sustatzen duen irakurzaletasuna sustatzeko programa baliatuz.
Izan ere, Argixorgin eleberriaren irakurketa eta lanketa egin dute ikasturtean zehar, Esti Vivancok idatzi eta Josebak ilustratu duena. Beraz, saiora galderak prestatuta joan zitzaizkion ikasleak, eta nobelaren nondik norakoak miatu ahal izan zituzten. Baina, horrez gain, marrazkiez eta komikigintzaz ere hitz egin zien, sormenaz, sortze prozesuez… Saio aberasgarria, zalantzarik gabe.
