Lizeoa kide den Lezoko Hezkuntza Foroak ikasturte berriari ekin dio, herri hezitzaile izateko konpromisoarekin. Aurten, haur eta gazteen ongizate emozionala, euskarazko aisia sustatzea eta komunitate parte-hartzaile baten garapena izango dira helburu nagusiak.
Lehenengo arloari eutsiz, Lezok “Altxa Burua” herri ekimenarekin bat egingo du, gailu digitalen erabilera egokiaren inguruan hausnarketa bultzatzeko. Gainera, merkatari elkartearekin elkarlanean “gurea erabil dezakezu” egitasmoa martxan jartzeko pausuak emango ditu. Egitasmo honen helburua da haur eta gazteei saltoki eta udal eraikinetako telefonoa erabiltzeko aukera eskaintzea.
Honen baitan, gurasoek hiru hitzaldietan parte hartzeko aukera izango dute, non teknologiaren erabilera, lagun arteko harreman osasuntsuak eta berdintasuna landuko diren. Eguberriak gertu direla, familiei opari hautaketa arduratsuari buruzko gomendioak ere emango zaizkie.
📷 OarsoaldekoHitza
