Herri lasterketa Antxon

Larunbat honetarako, hilak 28, "Euskaraz Bizi Nahi Dut" lasterketa herrikoia antolatu dute Pasai Antxon. Sanfermin Txiki jaien baitako ekitaldia izango da, eta, halaber, Kontseilua "Euskaraz Bizi Nahi Dut" lelopean Euskal Herrian barrena antolatzen ari den herri lasterketen dinamikaren parte.
Lasterketa 11:00etan abiatuko da Gure Zumarditik, Korrika Txikiaren antzeko ibilbide eginez. Antolatzaileen esanetan, “heldu bakoitzak haur batekin edo birekin, eskutik helduta, korrika egin ahal izango du. Ez da lasterketa lehiakorra izango; hau da, ez da sailkapenik egingo. Berdin dio aurrena edo azkena iristea helmugara. Haurrak eta helduak elkarrekin korrika jarri nahi ditugu, euskararen alde”.
Helduek bina euro eta haurrek euro bana ordaindu beharko dute lasterketan parte hartu ahal izateko; amaieran, berriz, zenbait sari zozkatuko dira parte hartzaile guztien artean.

Lerroon bitartez, beraz, lasterketan parte hartzeko gonbitea luzatzen diogu Lizeoko hezkuntza komunitateko partaide orori. Euskaraz bizi nahi dugu!