URRIAREN 20an NAFARROA OINEZ TUTERAN

Joan den urriaren 6an arrakasta handiz ospatu ziren Kilometroak Tolosan. Han izan ginen asko eta asko, ikastolen eta euskararen normalkuntzaren alde gure hondar alea jarriz.

Heldu den urriaren 20an, halaber, huts ezinezko beste zita bat dugu: NAFARROA OINEZ jaia, alegia. Tuteran izango da aurten, Taupadaz bat egin! lelopean, bertako Argia ikastolak antolatuta.

Kilometroetara joatea oso baliotsua bazen, zer esanik ez NAFARROA OINEZ-era joatea. Zoritxarrez, ezaguna baita Nafarroako Gobernuak euskararen, euskarazko irakaskuntzaren eta ikastolen aurka daraman politika. Eta NAFARROA OINEZ, hain zuzen, euskara nahiz euskal kultura sustatzeko ekimena dugu, ongi pasatzeko festa izatearekin batera.

Baina, halaber, ezin ahaztu NAFARROA OINEZ eta ikastolen mugimenduak antolaturiko beste lau jaiak, oraindik ere, ezinbesteko zaizkigula ikastola hezkuntza proiektuak ekonomikoki iraun ahal izateko. Auzolanean oinarrituz sortu ziren NAFARROA OINEZ gisako jaiak; eta auzolanari eutsiz, guztion lanari eta ekarpenei esker, sortuko ditugu ikastola berriak eta egunez egun indartuko ditugu ikastolen mugimendua eta euskara; Tuteran nahiz Tolosan, Hazparnen zein Balmasedan.

Horregatik, aurtengo NAFARROA OINEZ-era joateko autobusa antolatu du gure ikastolak.

Autobusa Donibanetik aterako da 8:30ean, eta ohiko paradetan hartuko du jendea San Pedro bidean. Etorrera arratsaldeko 18:00etan izango da. Prezioa: 8 euro helduok eta 5 euro ikasleok. Besteetan bezala egizue diru sarrera 2095 5089 54 1061799465 Kutxako kontu korrontean eta ikastolara bidali ordain-agiria zirkular honen aurrealdeko orri-oinarekin batera.

Eta, jakina, urriaren 20an Tutera joateko deia egiten diogu Lizeoko hezkuntza komunitateko partaide orori.

 

Tf: 943526850