SANTOMASAK, ABENDUAREN 20an

Pasa den asteburuan arrakastatsu ospatu genituen santomasak Antxon eta Donibanen, urtero bezala, hauek baititugu txorizo festa goiztiarrenak gurean. Webgunean bertan aurki ditzakezue bateko zein besteko irudi ederrak, argazki bildumen atalean.
 
Asteburukoa, hortaz, atarikoa izan zen, ostiral honetan, hilak 20, ospatuko baitugu San Tomas eguna ikastolan. Honatx egitaraua, etapaz etapa: 
0 eta 1 urtekoak
Geletan ospatuko dugu jaia, eta 10:00etan familiak gonbidatzen ditugu ikastolara hurbil daitezen festatxoa ospatzera.
 
Donibane, San Pedro eta Antxoko 2, 3, 4 eta 5 urtekoak; Lezoko 2, 3 eta 4 urtekoak eta LHko 1. eta 2. mailakoak
Goizeko 10:30ean irtengo gara kalera, eta Gabon kantak kalez kale kantatu ondoren ikastolara itzuliko gara.  Jolaslekuan kanten emanaldia egingo da; ondoren, saskiaren -LH 1. / 2. maila - eta txerritxoaren -HH- zozketa egingo dugu, eta txistorra ogitarteko goxoa jan.
Gurasoak gonbidatutazaudete festan parte hartzera eta pintxoak jatera.
 
Lehen Hezkuntza 3, 4, 5 eta 6. maila (Donibaneko plazan):
10:30ean abiatuko gara Lizeotik. Donibaneko plazan feria ikusi -ikasleek ekarritako produktuekin osatutakoa eta irakasleek antolatua-, eta 11:15ean Gabon kanten emanaldia izango da plazan bertan.
Ondoren saskien zozketa egingo dugu, eta bertaratzen zareten gurasoentzat pintxoak izango dira.
 
DBH eta Batxilergoa:
Ekimenez eta txapelketez beteriko egitarauaz gozatzeko aukera izango dugu, goiz-goizetik hasi eta 13:00ak arte: mus txapelketa, eskulan tailerra, ping-pong txapelketa, sokatira, brileta, karaokea, pilota eta futbito txapelketen finalak…
 
Ez ahaztu baserritar jantzia!
 
Festa eder honen azken ospakizuna hilaren 22an, igandearekin,  izango da Lezoko Saldiseko Plazan, Antxon 14an eta Donibanen 15ean egin dugun modu berean herriko beste eragileekin elkar lanean antolatuta.