Pasaia Lezo Lizeoa

Ipar Euskal Herriko ikasleen eskubideen alde, Azterketak Euskaraz kolektiboari babesa eskaintzeko, Lizeoan lehen aldiz, Lehen Hezkuntzako 3. mailatik Batxilergoko 2. maila arteko ikasle eta irakasle guztiak elkartu gara Goiko Pistan. Ia 1.000 lagun. Argazki ikusgarria!

Seaskako lagunek Baxoa eta Brebeta azterketak euskaraz egin ahal izatea aldarrikatzen jarraituko dugu.

Lesoinuk (Lezoko aste pedagogiko musikala) eskaintzen duen kontzertu pedagogikoetako batean egon gara LH1eko ikasleak, Gezalan. Bertan eskusoinua, klarinetea, tronpeta eta hainbat instrumentu ezagutzeko eta entzuteko aukera izan dugu.

Larunbata iluntzean iritsiko da KORRIKA Pasaiara eta Lezora. Ohi bezala, Lizeoko komunitateak lau lekutan hartuko du lekukoa. Aurten, jangelako eta garbiketako taldeek, DBHko euskara taldeko neska-mutilek eta Errota Lezoko Guraso taldekoek eramango dute euskararen lekukoa, harro.

Hemen lekuak eta gutxi gorabeherako ordutegia.

Animatu eta parte hartu!

Lehen Hezkuntzako bosgarren mailako ikasleek, ohi bezala,  bigarren hiruhilekoan egindako lanekin erakusketa galanta prestatu dute liburutegian eta pasilloan. Batetik, inguruko zein urruneko ekosistemen maketa ikusgarriak prestatu dituzte. Bestetik, artelanak landu eta pintura teknika desberdinak zintzilikatu dituzte paretetan.

Ohikoa da Lehen Hezkuntzako beste mailetako ikaskideen aurrean erakusketaren bisita gidatuak antolatzea, aurten, berrikuntza gisa, bisita gidatu bereziak prestatu dituzte gurasoentzako.

Batxilergoko bigarren mailako ikasleak errepresio frankistaren lekukotasunak ezagutzen izan dira Etxetxorekin.

Pasaiako Udalak sustatuta, egunotan, Lahia elkarteko Maria, Irune eta Izar Lizeoan dabiltza. Lehen hezkuntzako seigarren mailako ikasleei bina orduko lau formakuntza saio ari dira eskaintzen, sexualitateari buruz. Lahiako hezitzaileak, besteak beste, sexualitatea, hezkidetza eta indarkeria matxistaren prebentzioa ari dira lantzen gure ikasleekin.

KULUNKAN
Hizkuntza ohituretan eragiteko egitasmo honekin buru-belarri gabiltza. Aste honetan lehen hezkuntzako laugarren mailako ikasleak herrietako ikastoletara gerturatu dira (Donibane, Lezo, Antxo eta San Pedro) hiru urteko umeekin jolasean aritzera. Bisita hauen helburua da txikienek bere ohiko jolas lekuetan dabiltzanean euskaraz ariko diren erreferentziazko lagunak ezagutzea.

Eguerdietako ekintza gisa bertsolaritza aukeratu duten sei ikaslek bere lehen plaza egin berri dute Oiartzunen, Ander Lizarraldek lagunduta. Gelatik plazara sariketako lehen kanporaketan parte hartu dute eta saio ederra burutu dute.